A organización do Esmorga Fest anuncia que debido á redución de aforos e á necesidade de manter distancia de seguridade, non é posible levar a cabo esta edición dunha forma segura, e dentro do marco que marcan as autoridades. “Só podemos agradecervos todas as mensaxes de ánimo e apoio que recibimos todos estes meses e pola paciencia que demostrastes. A cancelación o día antes do festival supuxo un duro golpe, tanto para o noso ánimo como para a saúde económica do festival. Pero isto non fará que cesemos no noso empeño, de seguir sacando adiante unha nova edición do Esmorga Fest,” sinalan desde a organización.

Agradecen o traballo de todos os artistas, técnicos e traballadores do Esmorga Fest. Agradecen tamén a solidariedade dos que comunicaron que non desexan recibir o importe da entrada, “dándonos a oportunidade de poder regresar, non sabemos cando, nin como será iso, pero volveremos!”

En breve comunicarase o procedemento para a devolución de entradas, mentres desde a organización lamentan o anuncio de cancelación, “podedes imaxinar que nos rompe o corazón ter que transmitir esta noticia.”