A Concelleira de Cultura, Marina Doutón, acompañada pola 1ª Tenente de Alcalde, Gloria Prada, inaugurou no Centro Cívico de Monforte as xornadas “Camiños de coñecemento e experiencia. Proxecto de democratización do coñecemento”, encadradas dentro un programa de formación universitaria dirixido a maiores de 50 anos, froito do acordo que a entidade monfortina estableceu coa Universidade de Santiago de Compostela (USC).
O programa de formación universitaria, que é a primeira vez que se celebra en Monforte con estas características, está composto por diversos seminarios formativos, totalmente gratuítos.
Dende o Concello de Monforte destacan o éxito desta iniciativa indicando que se inscribiron 24 persoas nestas xornadas. O alumnado que accede a esta formación son persoas maiores de 50 anos que accederon á matriculación de xeito totalmente gratuíto e sen necesidade de acreditar ningunha formación previa específica.
A Concelleira destacou na súa intervención que “para o Equipo de Goberno do Concello e para Monforte é moi importante que se celebren este tipo de xornadas na nosa cidade, dirixidas á nosa poboación maior de 50 anos, que moitas veces non ten nin os recursos nin a oportunidade de acceder a este tipo de coñecementos”.
Neste senso, concluíu Doutón “con este programa garantimos o dereito de todos os cidadáns ó acceso a educación superior independentemente da súa idade, xénero, domicilio ou recursos, é dicir, contribuímos á democratización do coñecemento entre os nosos cidadáns”.
Obxectivos do programa de formación
O principal é favorecer a “democratización do coñecemento”, potenciando e difundido o coñecemento científico e artístico a toda a poboación maior de 50 anos nos concellos que se suman a este proxecto. Así, pois, as materias que se desenvolverán estes días terán os seguintes obxectivos específicos:
- Revalorizar e profundar no valor do noso patrimonio.
- Concienciar, ensinar e aprender da presenza da ciencia no día a día das nosas vidas.
- Recoñecer o valor das disciplinas artísticas nas nosas emocións e vivencias.
- Adaptar e coñecer as competencias sociosanitarias dos principios de envellecemento activo.
- Acadar unha mellora da calidade de vida, do benestar e da participación a través do exercicio intelectual que require este tipo de formación.