O Concello de Pantón está deseñando un ciclo de actuacións musicais ao aire libre para amenizar o verán e contribuír á dinamización económica dos establecementos hostaleiros.
Este sábado, 26 de xuño, comezan cun concerto de alto nivel que terá como escenario a Praza do Concello a partir das 23:00 h. Trátase do grupo “La penúltima Sabinera”, un tributo á banda de Joaquín Sabina e segundo algunhas críticas “quizais a mellor banda Tributo a Sabina de todo o panorama nacional”.
Por mor das normas sobre concertos que vai actualizando o Comité Clínico da Xunta da Galicia, o espectáculo realizarase de acordo as seguintes obrigas:
-Reserva anticipada de praza no teléfono 982 45 63 77.
-Os asistentes deberan de permanecer sentados con máscara.
-Non se permite fumar, comer nin beber durante o espectáculo.
-Deberán de facilitar nome, DNI e teléfono, datos que o concello custodiará durante 30 días como esixe a normativa anticovid da Xunta de Galicia.
A BANDA
Comezaron no 2012 como grupo de versións. Anos despois, coa voz do seu vocalista avalada por Pancho Varona e Antonio García de Diego, convértense quizais na mellor banda Tributo a Sabina de todo o panorama nacional.
Pasan de catro a sete membros, para ter así os mesmos compoñentes que a banda orixinal e obteñen desde os seus inicios unha fantástica acollida, así como unha moi boa crítica, enchendo en todas as prazas e auditorios nos que actúan.
Os seus concertos gardan unha gran semellanza aos que ofrece a propia banda do mestre de Úbeda. A súa música, vestiario e atrezzo arremedan tan ben á banda orixinal que transportan ao espectador ao espectáculo do gran Joaquín Sabina.
Carlos García-Boente, vocalista, tivo o pracer de compartir escenario coa banda de Joaquín Sabina en Lugo e Madrid (Sala Galileo Galilei).
