Este venres 2 de xullo, a Biblioteca Municipal do Saviñao comeza o ciclo de actividades do Programa ‘Ler conta moito’ deste ano, ciclo cofinanciado entre o Concello do Saviñao e a Consellería de Cultura.
A actividade que chega ao Saviñao será “As superheroínas do noso pobo” e desenvolverase na biblioteca municipal ás 11:00 h. da mañá coa narradora e ilustradora Estefanía Padullés. A autora, con numerosas obras infantís publicadas, vive no concello veciño de Paradela e xa ten visitado noutras ocasións a biblioteca.
A actividade que presenta Padullés é un obradoiro de ilustración que versará sobre mulleres esquecidas en diferentes campos, aprendendo a debuxalas nunha ilustración que as represente. Para rematar a actividade, cada participante fará un cartel dunha muller do seu entorno, para darlle visibilidade e convertela na “superheroína” dunha ilustración que amose os seus “superpoderes”.
Aplicaranse as medidas Covid establecidas para actividades culturais, polo que as prazas serán limitadas e deberán reservarse previamente na biblioteca ou no teléfono 982 45 23 24.
