“Urdimbre, historia de una desaparición” é a historia de dúas persoas que sofren a desaparición dun ser querido. A curtametraxe narra o xeito de afrontar os primeiros intres da desaparición e de como o temperamento de cada un lévalles a comportarse de forma diferente nuns momentos nos que non sempre é doado manter a cabeza fría.

Este traballo audiovisual, dirixido por Rufo García, preséntase a este festival monfortino considerando este que é “un gran escaparate onde amosar as mellores curtas de cine fantástico do momento”. Coa presenza neste certame péchase así un ciclo na produción e publicación deste traballo con marcado ADN monfortino.

O DIRECTOR

Rufo García desenvolveu a súa actividade profesional vinculado ao son durante case vinte anos. No seu haber conta con tres películas, sete documentais, dúas series e seis curtametraxes.

Entre estos traballos atópanse os multipremiados documentais locais “Os días afogados” da produtora Amanita Films, “TEMPO”, dirixida por Manuel Valcárcel, e “¿Cuándo fue la última vez que te contaron un cuento?” de Némesis Audiovisuales.

Rufo traballou tamén como técnico na compañía “Teatro do Liló” dirixida polo actor monfortino que nos deixou en xaneiro de 2019, Mario Roldán, e durante todo este tempo veu compaxinando o son coa imaxe na realización de eventos deportivos, sociais e políticos.