O xurado composto polo compositor musical Sergio Moure, a creadora de contidos Maria Yáñez e o director cinematográfico Sergio Morcillo concedeu o premio á mellor curtametraxe a Su rider, do director Alberto Utrera, un tenso relato que mestura o terror con problemática social; así mesmo, o xurado decidiu dar un premio especial á curtametraxe de Paul Urkijo, Dar-Dar, quen xa leva colleitados múltiples premios con esta terrorífica curtametraxe baseada nun antiquísimo relato vasco.

Como todos os anos, os asistentes ás proxeccións elixen por votación popular a mellor curta do público e este ano recaeu na curtametraxe Dana, da directora, Lucía Forner Segarra, que analiza o tema da violencia de xénero desde a óptica do terror. E a votación do público asistente á sesión das curtametraxes galegas decidiu que a mellor curtametraxe das proxectadas foi La Penumbra de Daniel Viqueira, quen xa hai uns anos levou o mesmo premio grazas á súa curtametraxe Limbo.