Cun auditorio completo, así comezou a homenaxe celebrada no auditorio de Chantada ó artista e arquitecto Manuel Jorge, falecido en maio do 2020. A pandemia impedira este recoñecemento hai un ano, e máis de cen chantadinos, o máximo de aforo permitido, sumáronse a este evento que contou con imaxes inéditas gravadas con Manuel Jorge e o concerto de música clásica a cargo de Luis, Javier e Manuel López Jorge, acompañados da violinista Mª Victoria Jericó.
Foi unha velada emocionante, na que Mercedes Vázquez, a presidenta da Asociación Amigos de Manuel Jorge de Chantada, anunciou a adquisición dunha vivenda no casco histórico para convertela nun museo de arte contemporáneo. Vázquez explicou que «era o soño de Manolo e agora tócanos soñar por el, e sobre todo actuar por el», destacando que o artista deixara o legado pictórico á Asociación e recursos para poñer este proxecto en marcha. «Pero non podemos facelo sós, precisaremos da implicación da veciñanza, dos colectivos culturais e sociais da comarca e sobre todo, das institucións», explicou.
De momento non se avanzaron máis detalles sobre a casa, agardando a que toda a documentación estea asinada, pero o acordo cos propietarios é firme e dende a Asociación queren tero proxecto definido antes de que remate o ano. Mentras, seguirán traballando para poñer en valor o legado artístico de Manuel Jorge, ofrecendo as exposicións que teñen en catálogo en itinerancia, como a de Manuel Jorge. Seis décadas de Retratos, que está na súa última fin de semana en Chantada.
