O concerto que ofrecerá a formación ‘2naFronteira’ forma parte das actividades que organiza o Concello de Monforte de Lemos arredor da ‘Xornada Europea da Cultura Xudía-Diálogos‘ e dentro tamén do 9º ciclo de Cultura no Camiño do Xacobeo 2021-2022 da Xunta de Galicia.
A entrada é de balde ata completar a capacidade do Edificio Multiusos –seguindo a normativa sanitaria no momento da actuación– e as entradas repartiranse dende as 19:15 h. e a entrada ao salón de actos realizarase ás 19:50 h.
2naFronteira, “A voz da pedra sefardí“
As antigas e nostálxicas cancións sefardíes, que tanto camiño levan andado por oriente e occidente, fan agora unha nova viaxe da man de 2naFronteira, que fan delas unha interpretación chea de sensibilidade e elegancia nun concerto variado, con cancións de amor, de berce, de voda…
A voz de Carmen Penim estará arroupada por Maurizio Polsinelli no piano e o harmonio, Miguel Paz na percusión e Carmen Gallego na nickelharpa e o violín.
2naFronteira leva máis dunha década interpretando este concerto “Cantos sefardíes de amor e vida” en festivais de cultura xudea, festas históricas e nas xuderías, como Ribadavia, Tui, Valença do Minho e en Italia. Chega agora a Monforte esta oportunidade de disfrutar cunhas melodías evocadoras e exóticas e ao mesmo tempo, familiares.
