“A idea central do acto é xuntarnos arredor da memoria dun piñeiro que viu pasar por diante del xeracións de galegos, xentes humildes que traballaban e padecían os poderes, pero que tamén eran felices e vivían as súas vidas con dignidade e plenitude”. Así se expresa Mónica ‘de Piñeiros’ para resumirnos cal foi o xermolo desta actividade.

O lugar escollido, o escenario onde terán lugar diferentes achegas artístico-culturais, será o devandito piñeiro sendo a intención en cada edición –pensando en que teña continuidade– que se lle dedique o acto a unha veciña ou veciño cuxa vida transcorreu e/ou transcorre arredor ou preto dese piñeiro. Nesta edición rememórase a existencia dunha muller, Hermitas Castro, ‘A Tula. Unha veciña de Piñeiros.

No acto, ademais deste acto central que lle dá senso á xuntanza arredor da memoria do piñeiro, realizaranse unha serie de actividades relacionadas coa música, a poesía… Será, en palabras de Mónica, unha “xornada de convivio, de achegamento para conformar o que nós coñecemos como cultura emocional”.

Os/as participantes que intervirán farano sen cobrar nada, “porque se trata de establecer un contacto entre persoas con amor á cultura, simplemente iso… actos de cultura libre, que non están subvencionados por ningunha entidade e polo tanto obedecen a un principio de autoxestión e a un principio de liberdade profunda”, remarca ‘De Piñeiros’ ao tempo que traslada o agradecemento a toda a xente participante.

PARTICIPANTES

O acto será o sábado 23 de outubro ás 17:00 h. no lugar de Piñeiros, no Concello da Pobra do Brollón, e participarán: Lois Diéguez, Caruncho, Suso Bahamonde, Xico de Carinho, Bruxo Queiman, Olga Novo e Mónica de Piñeiros.