A cita co Festival do Paradiso desenvolverase no aparcadoiro do Parque dos Condes o sábado día 1 de setembro desde as 21.00 h. Desde a organización buscouse un cartaz de estilos variados e apostando polos grupos galegos e da Ribeira Sacra. Ademais neste ocasión convidouse ao grupo estatal Mamá Ladilla.

No escenario estarán tamén, procedentes da Ribeira Sacra, Cadela Asasina que percorre a xeografía galega e portuguesa sementado foliadas; CoolFlanders que tocarán xoias da música negra, cantando rock, folk desde a profundidade do seu soul. Poderase vibrar e saltar con Vieitör. Contarase tamén con Compañía do Ruído, Mad Martin e Arremecaghona Monobanda. Pechando a noite, xa no pub Zoco, continuará a festa co Dj Maceda.

Para que o diñeiro non sexa problema para gozar con esta festa o Festival será de balde un ano máis. Desde a asociación organizadora agradecen a colaboración do comercio local, do concello de Monforte de Lemos, a Deputación de Lugo e o Consorcio de Turismo da Ribeira Sacra. Especialmente, agradecen o traballo das voluntarias e voluntarios, que desinteresadamente adican o seu tempo, cada ano, a que o festival sexa posible.