As propostas para o concurso poderán conter, de forma libre, calquera aspecto alusivo ao Nadal: os adornos, as luces, a árbore, a familia, a decoración de elementos turísticos do Saviñao, das súas rúas, etc.

Cada participante poderá entregar un só deseño realizado con técnica libre, en soporte folio ou cartolina e en formato horizontal de tamaño A4. As propostas deberán ser inéditas e, polo tanto, non se terán en conta as que non reflictan a creatividade dos nenos e nenas.

As bases do certame recollen cinco categorías: infantil (4º, 5º e 6º de Infantil), primaria A (1º, 2º e 3º de Primaria), primaria B (4º, 5º e 6º de Primaria), secundaria (1º, 2º, 3º e 4º de ESO) e categoría absoluta (deseño escollido entre os gañadores de cada categoría que será publicado no calendario de Nadal do Concello). O premio de cada categoría será dun vale de 50 euros para gastar no comercio local ata o 15 de decembro máis un diploma acreditativo. A entrega dos premios será notificada con antelación.

Os traballos poderán entregarse ata o día 25 de novembro ás 14.00 horas no rexistro do Concello ou na secretaría dos colexios de Escairón e Currelos acompañados, no dorso ou nun folio á parte, do nome e apelidos, curso, centro escolar, data de nacemento, teléfono do pai/nai/titor e título da obra.