O acto está encadrado dentro de Camiñografías, a xornada de peche de Ultreia et Suseia, o festival multidisciplinar que se celebra en Sarria desde o pasado 22 de xullo e ata o 13 de agosto
Nesta xornada celébrase Camiñografías, o día comezará ás 11:30 na Casa do Concello co encontro “30 anos no Camiño”, onde se fará restrospectiva da importancia do Camiño de Santiago. No coloquio participarán o ex conselleiro e impulsor do Camiño de Santiago, Víctor Manuel Vázquez Portomeñe; Luís Celeiro, vicepresidente da Asociación de Xornalistas e Estudosos do Camiño de Santiago; José Maria Díaz, xerente de Peregrinoteca e Silvia Mondelo, encargada do departamento do Camiño en bicicleta de Tee Travel.
A xornada continuará cun paseo teatralizado pola localidade. Este espectáculo será conducido por César Non, Ernesto Is, Nerea Brey, Javier G. Lojo e Mr. Brandán & CO. Será unha experiencia inmersiva onde se poderán descubrir as realidades históricas de Sarria. Ademais, este fin de festa de Ultreia et Suseia incluirá a actuación en directo do vigueses Caldo, unha formación que achega a música tradicional a contextos sonoros contemporáneos a través da experimentación cos propios instrumentos. Camiñografías pechará coa música de Jorginho DJ e JLG e cun xantar popular. O menú custa 8 euros e pódese reservar en Estanco Gallego e en Cafetería Casino. Tamén existe unha opción vexetariana.
Ademais, o xoves ás 21:15 na Sociedade da Unión proxectarase de maneira gratuíta Dorothé na Vila, un documental sobre a figura da musicóloga suíza Dorothé Schubarth, que chegou a Galicia a finais dos 70 en procura das cancións tradicionais desaparecidas. Desta investigación saíron 300 horas de gravacións que forman o denominado “Cancioneiro Popular Galego”. O venres ás 20:00 no parque do Chanto terminará a programación de narración oral con Na punta da lingua, o espectáculo de Ana Carreira, que promete darlle un xiro inesperado cheo de retranca aos contos populares. A continuación, no Auditorio Meigas e Trasgos, Carlos Blanco ofrecerá un espectáculo de monólogos. As entradas para este evento xa están á venda a través de Ataquilla e no Meigallo.
Ultreia et Suseia é un evento organizado pola produtora Etiqueta Negra e apoiado polo Concello de Sarria. Nace da unión do ciclo de monólogos Sarria Sorrí, que nas súas dúas edicións trouxo a grandes estrelas da comedia á comarca de Sarria e o festival de contos e de narración oral Narra Sarria.
