No transcurso do acto celebrado este mércores pola tarde na rúa Cardenal, onde as casetas permanecerán ata o sábado 27, o representante da Consellería de Cultura, Educación, FP e Universidades explicou que as citas deste ano involucraron a un total de 90 librarías, o que supón un incremento do 26% en relación ao pasado ano. “Ademais de contar cunha maior participación, as primeiras estimacións apuntan a que o volume de vendas acadado no conxunto destas citas tamén creceu máis dun 5% con respecto ao exercicio pasado, o que demostra que estamos nun gran momento para a literatura e o compromiso dos galegos coa lectura e o sector do libro”, salientou.

Na inauguración, a responsable de cultura monfortina, Marina Doutón, salientou que “esta Feira de Monforte é unha moi boa oportunidade para acercarse á literatura e ademais poder mercar o libro que nos gusta a prezos moi interesantes cun desconto do 10%, que sempre é unha axuda.”

A XXIII Feira do Libro de Monforte de Lemos comezaba coa escritora soberina, Moncha Prieto, como pregoeira e ata o sábado 27 contará cunha trintena de iniciativas e a participación das librarías Agrasar, Cortizas e da Proencia. As casetas estarán abertas de 11 a 14 horas e durante a tarde de 19 a 22 horas, (dacordo co programa ao que se accede premendo aquí)