O taboadés Alberto Fidalgo volve ser noticia tras alcanzar o terceiro posto no podio nunha competición estatal de Marcha Nórdica. Este resultado acadouno na súa categoria, sénior masculino, o pasado sábado na comunidade autónoma de La Rioja, concretamente en Arnedo, vila que acollía a 2ª proba de Ranking Nacional.

Fixo o percorrido de 12 quilómetros nunha hora, 15 minutos e 32 segundos, tempo que ademais permitiulle chegar 7º na clasificación xeral entre cento e pico deportistas. Respecto das sensacións, Fidalgo contestou a este medio que estaba contento e “satisfeito por cumprir obxectivos persoais e coa vista posta no futuro”. Preguntámoslle tamén por onde se perde para adestrar cando está en Taboada e dinos que ten varias alternativas, pero un dos seus lugares preferidos é “un circuito periurbano que lle chaman o Camiño dos Mouros, que é precioso. Entre castiñeiros e carballos”.

A vindeira proba será a 2ª Copa de España que terá lugar o 18 de abril na localidade navarra de Azagra.