A cita xira arredor dos concertos no escenario da área recreativa de Samugueiros o sábado pola noite a partir das 21:00. Este ano, o cartel está encabezado por tres formacións totalmente femininas. Tocarán o dúo Caamaño&Ameixeiras – Premio Martín Códax da Música 2021 na categoría folk –; a agrupación Leilía – formación pioneira na música tradicional de Galicia –; e a agrupación Habelas Hainas, que leva xa máis de 10 anos en activo cun potente e orixinal directo.  

O sábado de festival, ademais dos concertos da noite, haberá un vermú poético-musical ás 13:00 na Praza da Peza, coa participación das poetas Noa Moreira, Nuria Erre Pe, Esme Quiroga e Leti Breijo. No eido musical, participarán Nuncy Valcárcel e Habelas Hainas.

Sábado pola tarde, Montse Rivera, compoñente de Leilía, ofrecerá un obradoiro de baile tradicional na Casa da Cultura ás 16:30. Para participar hai que anotarse no teléfono 650 624 828.

Ao longo da tarde-noite do sábado, como é costume haberá na área Samugueiros barra e postos de artesanía e comida.  

O domingo, como todos os días 25 na Pobra do Brollón, haberá feira con postos de polbo e Mercado Circular, unha nova iniciativa municipal para apoiar o consumo local e sostible. Como excepción, o mercado celebrarase na área recreativa Samugueiros, onde ao mediodía o público poderá gozar do espectáculo de circo de rúa ‘C’est pas possible’ da compañía Sempre Arriba. O acceso a toda a programación de As Cores do Outono é de balde.