O concerto de Marta Cubas recolle obras que mostran algúns dos diferentes estilos que atravesou a música, embarcándonos nunha viaxe espazo-temporal que comeza en Nápoles ao redor do 1700 e finaliza en Nova York no S.XXI, percorrendo épocas que van desde o Barroco ata o Contemporáneo. Nesta travesía vense reflectidos os cambios nas técnicas compositivas e como se vai xerando unha necesidade de innovación a través dos recursos sonoros dos instrumentos. A entrada é de balde.
Marta Cubas Hondal (2002) é unha acordeonista que destaca pola súa gran capacidade de comunicación, sensibilidade e virtuosismo, cun amplo repertorio que abarca desde o barroco ao contemporáneo. Compositores como Alejandro Vivas, Alexander Yasinski ou Gorka Fermosa escribiron concertos expresamente para ela, estreados con orquestras como a Orquestra Metropolitana de Madrid, Nova Orquestra Sinfónica Ataúlfo Argenta ou a Nova Orquestra Sinfónica de Salamanca. Ofreceu recitais no Palacio de Festivais de Santander, no Festival de Camargo, e foi convidada pola Embaixada de España en Turquía para realizar un recital en Istambul.
Programa
- Domenico Scarlatti: Sonata en Fa menor K386
- Zuriñe F. Gerenabarrena: Izpi
- Alfred Schnittke: Suite Fairy Tale (selección)
- Antonio Soler: Sonata en Re menor No. 117
- Martin Lohse (1971-): Passing III
- Isaac Albéniz: Aragon, de Suite Española Op.47
- John Zorn: Roadrunner
