Isabel Rodríguez felicita ao persoal da Biblioteca de Sober polo Premio María Moliner

"Sodes un exemplo de compromiso co rural e a súa veciñanza, incentivando e fomentando a lectura nun municipio pequeno, con 2.200 habitantes, onde é máis difícil o acceso á literatura", destacou Rodríguez. A Biblioteca de Sober é un dos 370 proxectos premiados e a única da provincia.

Premio María Moliner biblioteca Sober / Subdelegada do Goberno

A subdelegada do Goberno en Lugo, Isabel Rodríguez, felicitou este xoves ás traballadoras da Biblioteca pública de Sober polo seu intenso traballo na promoción da lectura nos veciños e veciñas que residen no Concello, tras ser recoñecida co Premio María Moliner que concede o Ministerio de Cultura e Deporte. Fíxoo durante unha visita, acompañada do alcalde, Luis Fernández, e das traballadoras, Julia Fernández e Dunia Rodríguez, para coñecer de primeira man o traballo diario destas profesionais.

Isabel Rodríguez puxo en valor o labor do persoal da biblioteca soberina para desenvolver unha programación de actividades atractiva para a veciñanza, promovendo novos hábitos de lectura nos nenos e nenas e nas persoas maiores do municipio.  Así, explicou que a biblioteca está a levar a cabo o proxecto “Sober coa lectura 2022” co que se realizan iniciativas dirixidas aos máis novos, con idades de entre 4 e 12 anos, como as merendas con contos ou os obradoiros de lecturas temáticas; e actividades pensadas nas persoas maiores, con obradoiros de memoria e cun club de lectura, entre outras moitas.

Neste senso, a subdelegada avanzou que este recoñecemento do Goberno vai acompañado dunha achega económica de 2.777 euros destinada á compra de libros para ampliar o catálogo do centro. “Queremos que sigades con esta liña de traballo para acadar un dos obxectivos deste programa: achegar a literatura e a cultura a calquera persoa, independentemente de onde resida”, apuntou.

Os Premios María Moliner, que organiza o Ministerio de Cultura e Deporte coa colaboración da Federación Española de Municipios e Provincias, son un concurso dirixido aos municipios de menos de 50.000 habitantes, a través da cal se premian os mellores proxectos ou actividades de dinamización lectora desenvolvidas nas súas bibliotecas, co obxectivo de fomentar a lectura entre todos os colectivos sociais, especialmente entre nenos e novos, que constitúen.

DEIXAR UN COMENTARIO

Please enter your comment!
Please enter your name here