Este fito marmóreo colocouse na praza de Triacastela, nun acto público no que participaron a propia alcaldesa, Olga Fontal; o presidente de APECSA, Xosé María García Palmeiro; o presidente da Asociación de Amigos do Camiño de Santiago da Comarca de Sarria, Jorge López; o presidente da Asociación do Camiño de Shikoku, Hirofumi Matsuoka, e o xornalista homenaxeado, Lois Celeiro Álvarez, escritor e Valedor do Camiño, por designación dos seu veciños de Samos.
O Shikoku Henro é un camiño de peregrinación circular que recorre os templos budistas e moitos outros lugares sagrados ao redor da illa xaponesa de Shikoku, a máis pequena das principais illas de Xapón. Esta ruta de 1.200 quilómetros atrae cada ano a miles de peregrinos de todo o mundo. O Camiño de Santiago é o verdadeiro sinal da unión dos pobos de Europa e un dos principais motores da economía galega.