Máis de 80 músicos encargaranse de ofrecer un repertorio relixioso no templo chantadino como parte da programación que a Parroquia da Santa Mariña preparou para a celebración da Semana Santa.

O programa, que comezará por A Symphonic Prelude de Alfred Reed, St. Florian Choral de Thomas Doss, e Panis Angelicus, de Cesar Franck en arranxo de Alfred Reed, ten como elemento central a Missa Brevis do compositor holandés Jacob de Haan. Esta peza, dividida segundo partes dunha liturxia (Kyrie, Gloria, Credo, Santus, Benedictus, Agnus Dei), está escrita para coro e banda sinfónica, e foi encargada polo Consello Departamental para a Música e a Cultura de Haute-Alsace en Guebwiller (Francia), con obxecto da conmemoración do milenario do nacemento do Papa León IX en Colmar (Francia).

Ademais deste concerto, dentro da programación da Semana Santa a Banda de Música de Chantada estará tamén presente na Procesión dos Caladiños o Venres Santo e nos actos do Domingo de Pascua.