Miren Agur Meabe Plaza (Lekeitio, Bizkaia, 1962) é unha escritora e tradutora en euskera. Foi galardoada co Premio Nacional de Poesía 2021 por “Nola gorde errautsa kolkoan” (“Cómo guardar ceniza en el pecho”) e veu a Monforte a pasada semana convidada polo equipo de Biblioteca Olga Novo para ofrecer un recital poético ao alumnado de 4º ESO A+B. Este recoñecemento a nivel nacional foi o primeiro que se lle outorgou a unha obra escrita en euskera.
Miren é diplomada en Maxisterio e licenciada en Filoloxía Vasca, e desde 1990 dirixiu a editorial Giltza-Edebé no País Vasco. Na actualidade, o seu traballo está centrado na tradución e na creación literaria. Como escritora, a súa obra desenvólvese sobre todo arredor da poesía e da literatura infantil e xuvenil.
Ao longo da súa carreira foi galardoada con outros premios e varias das súas obras foron traducidas ao
catalán, español e galego. Desde 2006 é membro colaborador da Real Academia da Lingua Vasca-Euskaltzaindia.
Dende a dirección quixeron salientar tamén que “foi un fermoso recital no que a poeta demostrou a súa implicación sabendo en todo momento conectar co alumnado”.
