A programación de Nadal do Concello de Sober comeza o vindeiro 9 de decembro co concerto da soprano Aida Gimeno e alongarase ata a tradicional cita cos Reis Magos, o 5 de xaneiro de 2024 no Centro Sociocultural.
O día 15 terá lugar a inauguración do Belén e o acendido oficial do alumeado de Nadal na Praza do Concello ás 18:30 h. e o sábado 16 á mesma hora haberá “Cánticos de Luz e Nadal” a cargo de Xosé Carlos Caneiro e Emilio Rúa na Igrexa de Bolmente.
O esperado Festival de Nadal a cargo da Escola Municipal de Música de Sober será o domingo 17 ás 18:30 h. no Centro Sociocultural e a visita de Papá Noel o día 21. Este día pasará polo PAI de Sober ás 12:00 e polo CEIP Plurilingüe Virxe do Carme ás 12:30 h.
CONCERTOS E FESTA INFANTIL
A programación contempla outros dous interesantes concertos no Centro Sociocultural. Un o día 23, “En Clave de Fado”, a cargo do grupo tradicional Os Carunchos, ás 19:00 h.; e outro o día 28, “Concerto de Nadal”, da man de María do Ceo ás 20:00 h.
E para goce dos máis pequenos, os días 27 e 28 o Pavillón do Colexio será o escenario da Festa Infantil.
CERTAMES DE NADAL
Para incentivar a creatividade relacionada co Nadal, o Concello de Sober vén de convocar varios certames nos que se premiarán as creacións presentadas con lotes de libros e vales de compra nos comercios locais.
Concretamente haberá un certame de Beléns, con 2 categorías: infantil e adulto; un certame de postais, con 4 categorías: Ata 8 anos, de 9 a 11 anos, de 12 a 16, e a partir de 17; e un certame de Decoración de Locais Comerciais.
O prazo de presentación de solicitudes para participar está aberto ata o 21 de decembro debendo presentar o impreso de solicitude, as postais a concurso e/ou a foto do belén e da decoración de locais.
No concurso de postais concederanse tres premios por categoría, consistindo estes nun lote de libros e diploma; no de beléns e decoracións haberá vales de compra para os 3 primeiros e un de consolación para os que non gañen de 20€.
Para máis información preguntar na Biblioteca Municipal, enviar un correo electrónico a cultura@concellodesober.com ou chamar ao 982 460513.
XANEIRO
Chegando ao novo ano, dúas datas para marcar na axenda. O día 2, no que haberá “Cantos de Reis” coa agrupación musical local O Trícole ás 18:00 h.; e o 5 de xaneiro ás 12:00 h. que será cando cheguen a Sober os Reis Magos. As dúas actividades serán no Centro Sociocultural.
