Tras dous anos sen sacar temas, neste 2024 a banda de Chantada TIAM Gz chega cargada de forzas co seu novo single “Volta ao xogo”. Esta co-produción de Mr.Mati (produtor e DJ do grupo) con Petrowski (produtor de gran prestixio no panorama galego e ex integrante do grupo Ezetaerre), sobre a que escriben e interpretan, coma sempre, Torozas, Iagueiro e Alessov conta cun videoclip da man de Lara Caeiro e Lorenzo Negueruela.
Con TIAM Gz volve a música festeira e de protesta en galego. A súa música leva ao público dende as cancións máis reivindicativas ata as sonoridades máis bailables. Unha experiencia que, dende o grupo, cualifican de “feita para vivir co público, que é un protagonista máis do directo”.
Os chantadinos combinan iso que a xente tanto bota en falta e iso que á xente tanto lle gusta: positividade, colectividade e xustiza social. Todo comeza en 2018 cando catro amigos da infancia de Chantada deciden formar un grupo de rap. A realidade é que non tiñan moito en común en canto aos seus estilos musicais, pero si había un obxectivo claro: facer música para desfrutar, facer desfrutar e transmitir os seus valores. Así é como co flow do Torozas, co estilo do Iagueiro, coas métricas do Alessov e coas melodías do Mr. Mati nace TIAM Gz.
Ata o momento, TIAM Gz contaba cun álbum chamado [De] Construción (2021) no que se mesturan diferentes estilos: hip-hop, pop, acústica, trap, etc. Incluso teñen a súa propia versión da Muiñeira de Chantada: a Muinheira-rap ou se atreven cun reggaetón en toda regra, “Ruada”. Dende o seu nacemento, a banda vén colaborando con grandes artistas do panorama musical galego como SFDK, Rebeliom do Inframundo, HIgh Paw, Rastreros ou Cuarta Xusta. Para coñecer a súa traxectora anterior pódese recuperar a entrevista que lle fixo Xornal de Lemos no 2020.
PRESENTE E FUTURO PRÓXIMO
“Volta ao xogo” é so un adianto de todo o que está por vir: un novo EP que sairá en verán con sons electrónicos. “A espera valeu a pena, o parón serviu para volver con máis forza ca nunca, cun salto de calidade tanto na parte visual”, salientan dende a banda.
