O Museo Pazo de Tor acollerá os vindeiros 6 e 7 de maio a cuarta edición das Xornadas Pacegas, un punto de encontro entre a investigación académica e a acción cultural comprometida co patrimonio, que este ano terá como eixo temático as Revoltas Irmandiñas, determinantes para o nacemento dos pazos como construcións que substituíron as torres e casas forte derrocadas, e polo tanto, do propio Pazo de Tor e da configuración actual da Fortaleza de San Paio de Narla.

O encontro, que pretende crear un espazo de divulgación da actividade investigadora, vinculándoa á conservación do patrimonio, reúne medievalistas e historiadoras da arte das universidades de Santiago e Vigo, e do CSIC.

As xornadas están abertas a todo tipo de público que queira asistir. A inscrición debe realizarse vía email a concertacionsrmp@gmail.com. O  prazo de inscrición está aberto ata o día 4 de maio ou completar o aforo (45 persoas).

Programa

Luns, 6 de maio. Fortalezas, Irmandade, irmandiñas, Igrexa e nobreza

• 16:30 Xosé Manuel Sánchez Sánchez, Profesor axudante doutor, Área de Historia Medieval (Facultade de Xeografía e Historia) da USC. Coordinador do Máster Interuniversitario Patrimonio Cultural Dixital. Medievalista interesado na historia social do poder, da vida cotiá e mentalidade medievais. Ofrecerá un relatorio sobre os castelos galegos e a súa imaxe na revolta: “Irmandiños, revoltas, castelos e ideas: atacando os edificios que amosan o poder”.
• 17:15. Francisco Javier Pérez Rodríguez, Doutor en Historia Medieval pola USC. Profesor titular na área de Historia Medieval do Departamento de Historia, Arte e Xeografía da Universidade de Vigo (Campus Ourense). Especializado na Historia da Igrexa no Reino de Galiza durante a Idade Media, o seu relatorio abordará o papel xogado pola Igrexa nas revoltas: “A participación da Igrexa galega nas revoltas irmandiñas”.
• 18:00. Miguel García Fernández, Técnico superior de actividades técnicas e profesionais do Instituto de Estudios Galegos Padre Sarmiento (CSIC), especialista en Historia Medieval e Moderna e na historia social das mulleres na Idade Media. Intervirá cunha charla sobre as mulleres galegas ante a revolta irmandiña cunha figura directamente involucrada: dona Teresa de Zúñiga: “Para que “los pequeños e los medianos e los grandes vivamos bien”: dona Teresa de Zúñiga e as mulleres galegas ante a revolta irmandiña”.
• 18:45. Pablo Otero Piñeyro Maseda, Director do Instituto de Estudios Galegos Padre Sarmiento (CSIC), Doutor en Historia pola USC, desenvolve a súas liñas de investigación arredor das coleccións documentais de mosteiros e casas nobres e da historia social da nobreza galega da Baixa Idade Media. Participa cun percorrido pola casa señorial galega despois das revoltas:das torres aos pazos: “A casa señorial en Galicia tralas revoltas”.
• 19:30. Simón Vicente López, Doutor en Historia da Arte pola USC, traballa como auxiliar de sala na Rede Museística Provincial de Lugo. O seu relatorio abordará a doazón dunha escultura de cabaleiro medieval relacionada coa liñaxe do Pazo de Tor: “A morte do cabaleiro de Tor e o seu bestiario”.

Martes, 7 de maio. Donas e cabaleiros ante a morte:iconografía dos sepulcros galegos na Baixa Idade Media

• 16:30. María Dolores Barral Rivadulla, Profesora Titular do departamento de Historia da Arte da USC, universidade na que se doutorou. As súas investigacións abranguen aspectos iconográficos, arquitectónicos e artísticos da Idade Media con particular interese pola mentalidade e o comportamento social da nobreza baixomedieval. O seu relatorio asumirá o caso dos sepulcros das mulleres galegas nos anos finais da Idade Media: “Dime como vistes e adornas e direi quen es. A imaxe da muller na escultura funeraria medieval galega”.
• 17:15. Marta Cendón Fernández, Profesora Titular de Historia da Arte na Facultade de Xeografía e Historia da USC, é doutora en Historia da Arte cunha tese sobre iconografía funeraria episcopal. Estuda o mundo das imaxes iconográficas arredor da morte e das mulleres galegas na Baixa Idade Media, con publicacións, así mesmo, sobre sepulcros baixomedievais de reis e cabaleiros. Falará sobre a búsqueda da eternidade dos cabaleiros galegos a través dos seus sepulcros: “Guerreiros para a eternidade. Sepulcros de cabaleiros na Galicia Baixomedieval”.