O Concello de Quiroga ofrece varias actividades estas semanas para conmemorar o Día das Letras Galegas. Concretamente, vén de presentar un certame de narración e debuxo infantil, organiza unha saída a Santiago de Compostela para ver unha obra teatral producida polo Centro Dramático Galego, e convida a vivir o día propio das letras cunha interesante obra sobre a emigración no Auditorio Municipal.
CERTAME LITERARIO
O certame de narración e debuxo infantís está convocado pola Biblioteca Pública Municipal de Quiroga na súa fase local. Poden participar todos os nenos e nenas que o desexen con narracións en galego ou debuxos sobre o tema “Ler para pensar, pensar para ser libres”.
Cada autor e autora poderán presentar cantos traballos desexen. No caso da narración cunha extensión máxima dun folio por unha soa cara, mecanografados, escritos a computador ou a man; neste último caso sempre en bolígrafo e nunca a lapis. E no caso dos debuxos deberán estar feitos sobre cartolina de tamaño aproximado de DIN A4.
Con cada traballo acompañarase unha folla co nome e demais datos do autor en letra maiúscula e entregaranse na Biblioteca Municipal antes do 14 de maio.
Establécense tres categorías: A, ata 8 anos, B de 9 a 11 anos, C, de 12 a 16 anos. O xurado, formado por persoas entendidas na materia, seleccionará por cada modalidade e categoría un máximo de tres traballos. O fallo farase público antes do Día das Letras Galegas e os premios consistirán en lotes de libros e diploma.
Os traballos premiados nesta fase local participarán na fase provincial do Certame, convocado pola Biblioteca Pública Provincial de Lugo, co patrocinio da Consellería de Cultura, Lingua e Xuventude da Xunta de Galicia.
REPRESENTACIÓNS TEATRAIS
A veciñanza quiroguesa terá dúas propostas teatrais en galego moi interesantes para a vindeira semana Unha será a viaxe a Santiago para asistir á representación da última produción do Centro Dramático Galego “Os actos e as profecías”.
Os veciños e veciñas de Quiroga que desexen asistir, poderán subirse ao autobús o xoves 16 de maio. O autobús partirá ás 15h. da tarde dende a Casa da Cultura, para poder chegar a función que comezará ás 18h. A actividade ten un custe total de 3€, e os/as interesados/as, deben anotarse canto antes na Casa da Cultura a través do 982 43.51.25 ou do correo electrónico cultura.quiroga.quiroga@eidolocal.es
A iniciativa cultural parte do Centro Dramático do Centro Galego.
SINOPSE
“Os actos e as profecías” é a gran produción central do Centro Dramático Galego deste ano, unha comedia que inventa un universo ao redor dos talent show. Conta cun elenco de 20 actores e actrices baixo dirección de Tamara Canosa, acompañada na dramaturxia por Xacio Baño. A obra que se estreaba no pasado 11 de abril, estará en cartel ata o vindeiro 26 de maio, e durante este mes e medio o Centro Dramático habilitará un autobús dende os distintos puntos de Galicia para poder asistir.
E a derradeira das actividades programadas con motivo das Letras Galegas terá lugar o propio día da celebración, o venres 17 de maio. Trátase da representación teatral a cargo da compañía Tarabela Creativa “Boa sorte, mala fama”.
SINOPSE
Sempre se soubo que as andoriñas son aves de bo augurio e que alí onde aniñan traen fortuna. Pouco se fala, en cambio, do molestas que se lle fan a moita xente. Por iso estas aves dan boa sorte, pero teñen mala fama. Ningún outro animal se parece tanto aos emigrantes galegos: estamos en cada continente, vivimos facendo colonias, temos na cabeza o camiño de volta a casa e marchamos por necesidade. E, igual que as andoriñas, ganamos mala fama, alá onde fomos a buscar a nosa boa sorte. Este espectáculo nace da necesidade de contar, precisamente, aquilo do que pouco se fala.
Esta obra, que se poderá ver no Auditorio Municipal a partir das oito do serán, está organizada pola Área de Normalización Lingüística, co patrocinio da Área de Cultura Vicepresidencia Primeira da Deputación Provincial.
