As obras, executada ao 80%, está previsto que rematen para finais de ano, lévanse a cabo a través dun convenio de colaboración entre as dúas administracións polo que o Goberno galego inviste neste ben 300.000€, o 51% do orzamento total.
Na súa visita, xunto co alcalde de Chantada, Manuel Lorenzo Varela, e o delegado territorial da Xunta en Lugo, Javier Arias, o responsable autonómico de cultura afirmou que esta achega encádrase no “noso compromiso con facilitar que a actividade cultural estea ao alcance de todos os galegos e galegas, sexa cal sexa o seu lugar de residencia, en liña cos obxectivos da futura Lei de cultura inclusiva e accesible de Galicia, que entrará en vigor este mesmo ano”. Neste senso, destacou o “papel fundamental que teñen os equipamentos deste tipo no acceso ao coñecemento da cidadanía”.
Na visita, o responsable autonómico de Cultura puido comprobar o aproveitamento que se está a facer dunha edificación tradicional para convertela nun espazo modelo en materia de accesibilidade e que cumprirá, subliñou, “coas necesidades dunha veciñanza que a bo seguro vai gozar das posibilidades culturais que se abren con esta nova sede da Biblioteca Municipal”.
O espazo da nova biblioteca situado no trazado do Camiño de Inverno, na rúa Formoso Lemos, ademais de dar un servizo cultural á zona, tamén terá a posibilidade de ser un punto de visita importante para os peregrinos que percorren esta ruta ao seu paso polo municipio.
O edificio, que recibiu unha partida de 300.000€ distribuídos en tres anualidades (2022, 2023 e 2024) por parte da Consellería de Cultura, Lingua e Xuventude, distribúese en dúas plantas, recuperando elementos primitivos e eliminando outros que foron engadidos ao longo do tempo á construción inicial. Desta maneira, o proxecto que se está a levar a cabo aposta por un deseño tradicional e integrado na contorna pero cunha funcionalidade propia do noso tempo, o que permitirá mellorar o desenvolvemento da actividade e optimizar os recursos da biblioteca en beneficio das persoas usuarias.
Visita Conselleiro Cultura nova biblioteca Chantada / Consellería de Cultura
