A primeira das actividades, un obradoiro de coñecemento e de elaboración de regueifas, levouse a cabo en Quiroga co alumnado de 5º e 6º de Primaria dos dous concellos; e agora, farase unha actuación de Regueifas no Concello Ribas de Sil.
A demostración desta enxebre tradición cos regueifeiros Lupe Blanco e Suso de Xornes -que fai posible Oral de Galicia co patrocinio da Concellería de Cultura, Lingua e Xuventude da Xunta de Galicia- celebrarase o venres, 11 de outubro, ás 19:00 h no salón de actos do Concello de Ribas de Sil.
Xosé Manuel Fernández, concelleiro de Normalización Lingüística do Concello de Quiroga, e Roberto Castro, Tenente de Alcalde e Concelleiro de Cultura de Ribas de Sil, convidan á participación “para coñecer en vivo, da man de 2 grandes regueifeir@s do país, unha das tradicións orais máis importantes que temos. Animamos tamén aos cativos e cativas que estiveron no obradoiro de setembro a que veñan en familia a ver o espectáculo en directo”.
A regueifa é a manifestación máis estendida en Galicia da secular arte popular da improvisación oral en verso, da que se atopan referencias desde a Antiga Grecia. Este feito levou a entidades, como por exemplo ‘Oral de Galicia’, a recuperar esta tradición, difundila con obradoiros e actuacións e incluso colaborar na celebración do Certame Internacional de Improvisación Oral en Verso que organiza en Vigo anualmente o Centro Veciñal e Cultural de Valadares.
