A exposición contén 48 debuxos feitos por nenos persoa e nenas, arredor da temática da Guerra, a cal estaban a vivir en primeira persoa, nenos e nenas que ou ben foron evacuados cara as colonias escolares de Levante, ou ben foron exiliados á U.R.S.S. De feito o comisario da mostra, Vladimir Merino Barrera, é fillo dunha das nenas que tivo que marchar á U.R.S.S. en 1937.

Neste senso a exposición rende homenaxe a estes nenos e nenas refuxiados de guerra, que sobre sinxelos papeis fixeron os seus debuxos, e tamén homenaxea ós homes e mulleres que tomaron a iniciativa de socorrer a estes nenos e nenas españois que sufriron directamente a guerra e a separación das súas familias.

Durante a inauguración o rexedor monfortino destacou, “Esta exposición debe servir para que nos sensibilicemos e tomemos conciencia da crudeza da guerra e da importancia de vivir en paz. Debemos traballar xuntos para construír un mundo onde os nenos e as nenas poidan soñar e prosperar, lonxe das sombras da guerra. Lembremos: os nenos son o futuro. Non deixemos que a guerra lles roube esa esperanza”.

Este martes, 5 de novembro, por iniciativa do Equipo de Goberno, está previsto que visiten a exposición alumnos e alumnas de 4º da ESO dos centros educativos de Monforte.

A exposición permanecerá aberta na Casa da Cultura Poeta Lois Pereiro ata o 29 de novembro de 2024.