A programación iniciarase o xoves, 30 de xaneiro, coa obra As gardiás, espectáculo para público adulto, a cargo do  grupo Ningures Produción. No mes de febreiro, xoves día 13, a compañía De Ste Xeito Produción traerá a escena a peza Neura, tamén para público adulto. Culturactiva representará As Alumnas o xoves 13 de marzo, para público adulto. Pola súa banda, Galeatro Producións Escénicas, actuará o xoves 27 de marzo para pór en escena Arte sen guión. Berrobambán, interpretará a obra Mulleres que viven soas, que se representará o 10 de abril. O Centro Dramático Galego pechará o ciclo deste primeiro semestre de 2025 dirixido a público adulto coa obra que leva por título Manuela Rey Is In Da House, o xoves 15 de maio.

O Equipo de Goberno non se esquece do público infantil, que contará con dúas representacións: o domingo 16 de marzo, a da compañía Magín Blanco, coa obra A nena e o grilo camiño das cores. E o domingo 11 de maio, Redrum Teatro representará Os contos de Lobicán.

Todas as obras mencionadas poñeranse en escena no Auditorio do Edificio Multiusos do Concello de Monforte, en horario de tarde, ás 20:15 horas as representacións de teatro adulto, e ás 18:00 horas as dirixidas a público infantil.  

Como todos os anos, o Concello mantén o prezo habitual das entradas, sendo a entrada xeral dun importe de 5€, e haberá entradas bonificadas para nenos, estudantes, desempregados e xubilados cun importe de 3€.

O Alcalde pon en valor o “compromiso que mantén o Concello de Monforte de brindarlle á veciñanza unha oferta cultural de calidade coa difusión de espectáculos variados e para todos os públicos entre os que se atopa a programación teatral para este primeiro semestre de 2025”.