O pasado 22 de xaneiro tiña lugar na Biblioteca Municipal de Escairón a inauguración dunha exposición de banda deseñada cos traballos do alumnado realizados no transcurso dun obradoiro impartido pola debuxante e escritora Estefanía Padullés.

No acto estiveron presentes seis profesores, cincuenta estudantes da ESO do centro educativo de Escairón, Estefanía Padullés, a bibliotecaria, Mónica Carballo, e o alcalde, Carlos Armesto. Na mostra poderán verse 26 historias que inician coa frase: A noite caera sobre as ruínas,… unha noite fría e chuviosa. Achegábase a tormenta.

As obras estarán expostas ata o 17 de febreiro, data a partir da cal serán trasladadas a outro espazo expositivo por determinar.