Comeza a tempada 2025 de programación teatral no Concello de Monforte. No primeiro semestre do ano 2025 representaranse 8 pezas, 6 para público adulto e 2 para público infantil e familiar.
O deseño da programación faise dentro da Rede Galega de Teatros e Auditorios, sendo este xoves 30 de xaneiro ás 20:15 h. a primeira función para adultos e titulada As gardiás, da compañía Ningures Produción. A peza está dirixida por Cristina Domínguez e interpretada por Casilda Alfaro, Melania Cruz, Amparo Martínez, Rebeca Montero e Sonia Rúa.
Como é habitual, a obra teatral poderá verse no Edificio Multiusos e o prezo da entrada xeral para esta obra será de cinco euros e tres para desempregados, xubilados e estudantes.
SINOPSE
As Gardiás, ou o dereito a decidir como xestionar a nosa propia vellez.
O humilde piso de Rosa, nun vello edificio no corazón dun barrio popular dunha vila obreira, é o refuxio acolledor dunha tribo de catro mulleres maiores organizadas.
Rosa (que se topa nunha cadeira de rodas) e as súas compañeiras, Ana, Marga e Susana, son operarias xubiladas da industria téxtil, e están decididas a preservar a súa independencia. Cando a filla de Rosa, Vitoria, propón trasladala a unha institución médica e vender o apartamento, comeza unha loita entre dúas visións do ben envellecer.
Enfrontadas ás decisións de Vitoria, as vellas mulleres defenden o seu dereito a vivir xuntas e en liberdade e artellan unha serie de estratexias para convencer a Vitoria de que a súa é a postura mellor.
