O acto celebrouse na que fora a casa de Concepción Casal, en San Vicente de Agrade, en Chantada. Participaron o seu fillo, Suso do Rei, e outros familiares e veciñas que lembraron a Concha como unha muller que destacaba pola “súa intelixencia natural e sensibilidade para expresar con palabras os sentimentos que saian do seu corazón” e que tivo un papel relevante na comunidade impulsando a creación da escola de San Vicente ou colaborando na reforma da igrexa.
Tamén achegaron a súa visión sobre a figura de Concha e das cantareiras, a investigadora e intérprete, Alba María e Isabel Vigo, técnico do Arquivo do Patrimonio Oral da Identidade (APOI), que conserva audios de Concha, dixitalizados a partir de cintas casete que intercambiaba coas súas fillas e netos na emigración en América.
A deputada de Cultura, Iria Castro, agradeceu a familiares e veciñanza de San Vicente de Agrade que compartiran as suas lembranzas sobre Concha e valorou o marco “que ofrece a celebración das Letras Galegas para seguir investigando, documentando, divulgando e recoñecendo o legado das cantareiras, comezando polas que temos máis preto de nós”.
Nese obxectivo, encadrou o proxecto “Cantareiras e cantares” sobre as coplas e os ciclos do ano que a área de Cultura esta a difundir en Youtube e a serie de podcast Folcast, “que afondará na figura de cantareiras e colectivos da provincia e do seu papel como transmisoras e conservadoras do idioma e da cultura popular”
A xornada contou ademais coa participación das pandeireteiras de Dakidoasma, que interpretaron algunhas das coplas recollidas de Concha e outras pezas do repertorio.
Folcast
Concha de Agrade, unha das informantes de Dorothé Schubarth para o “Cancioneiro Popular Galego”, é a protagonista do primeiro episodio da serie de podcast “Folcast” sobre a oralidade e a música tradicional impulsado pola Vicepresidencia da Deputación de Lugo da man de Xosé Gago e Branca Villares. O capítulo, que se lanzará nesta semana, ofrece unha visión completa da súa figura alén de achegar novos datos froito do proceso de investigación e documentación realizado para a súa edicion.
O proxecto Folcast, que inclúe dez episodios, percorre as comarcas da provincia na procura das portadoras e transmisoras da poesía tradicional. Os episodios terán entre 45 e 60 minutos de duración e terán unha emisión mensual na páxina web da Deputación de Lugo e en distintas plataformas, aínda que tamén se emitirán episodios especiais. Conta cun perfil de Instagram (@folcast_radio), no que se poden seguir as emisións e acceder a contido extra
