Os amigos e amigas da música instrumental teñen o vindeiro 25 de maio unha ocasión de gozar dun interesante concerto de acordeón en Sober. O Dúo Éire, formado por Marta Cubas Hondal e Elisa Ruiz Ibarlucea, ofrecen un espectáculo no Centro Sociocultural que leva por título ‘Reflexos Folclóricos’.
O concerto realízase dentro do ciclo “Primavera Musical” que presenta composicións cun sólido lazo co folclore, xa sexa ao estar inspiradas directamente nas tradicións musicais de diversas rexións ou ao explorar a dualidade entre o contemporáneo e as raíces.
O Dúo Éire, formado por Marta Cubas Hondal e Elisa Ruiz Ibarlucea, xurdiu no ano 2019 dentro das instalacións de Musikene-Conservatorio Superior de Música do País Vasco, lugar que viu medrar a ambas, individualmente e como dúo. Desde ese momento compartiron moitas horas de traballo conxunto, o que se viu reflectido no XIII Concurso de Música de Cámara da Cidade de Ávila, onde obtiveron o primeiro premio no ano 2023. Anteriormente tamén foron galardoadas no V Concurso de Interpretación para Estudos de Acordeón Aris do Porto, con 1er Premio na categoría de música de cámara.
Ademais disto, é un dúo que mantén unha estreita relación con compositores do panorama musical actual. Recentemente estrearon unha obra composta expresamente para elas, titulada ‘Borina’, de Iñaki Carcavilla Garasa, e axiña estrearán obras de Brais Novoa, Carcavilla, Juan de Dios Ruiz, e Lorenzo Sorgi, compostas a través dun traballo moi estreito entre os compositores e as intérpretes. Como valor engadido tamén se cómpre salientar que recibiron masterclasses de músicos destacados como Veli Kujala, Stefan Hussong, Marko Sevarlic, Iñaki Diéguez, Philippe de Ezcurra, Miren Iñarga e Iñaki Alberdi, entre outros.
