Durante esta pasada fin de semana, e dentro deste ciclo da ‘Semana do Patrimonio Invisible’ realizáronse visitas ao encoro de Belesar (Chantada) –por primeira vez aberto a público non especializado–, á cova de Santalla de Louzara (Samos), á Ferrería de Penacova (Bóveda), ao mosteiro de San Vicente do Pino (Monforte de Lemos), ao Pazo de Ferreiroá (Pantón) e á Igrexa do Hospital, no Concello do Incio.
A deputada de Cultura Iria Castro participou na visita a este último edificio devandito, incluido dentro do circuíto de espazos históricos e culturais pouco coñecidos da Vicepresidencia da Deputación. Os visitantes puideron gozar dunha igrexa que destaca pola arquitectura e o mármore azulado co que foi construída. Un tesouro patrimonial que fascina desde fóra e que garda tesouros artísticos no seu interior.
SEMANA DO PATRIMONIO INVISIBLE
Este ciclo ofrece a oportunidade única de descubrir lugares fóra dos circuítos turísticos convencionais, a través de visitas guiadas en grupos reducidos. As visitas, gratuítas e deseñadas para grupos dun máximo de 15 persoas, garanten un tratamento próximo e de calidade e unha inmersión profunda en cada localización.
En palabras de Iria Castro “con este ciclo de visitas visibilizamos diferentes espazos fomentando o coñecemento e a valorización da diversidade patrimonial da provincia e sensibilizando sobre a importancia da protección e conservación do patrimonio”.
O programa continúa a vindeira fin de semana, 14 e 15 de xuño, con novas oportunidades para visitar San Vicente do Pino (mosteiro monfortino), o Pazo de Ferreiroá en Pantón e A ferrería de Penacova (Bóveda) na Comarca de Lemos. E tamén para visitas ao seminario de Santa Catalina (Mondoñedo), ao mosteiro de San Salvador de Lourenzá (Lourenzá) e aos mananciais de Mondoñedo.
A participación neste programa faise a través de reserva online na plataforma da web https://www.patrimonioinvisible.gal/ e pódese obter máis información no correo electrónico reservas@patrimonioinvisible.gal
EN LIÑA CO PROGRAMA SOTERRADAS
A I Semana do Patrimonio Invisible da provincia de Lugo desenvólvese no marco do programa SoTERRADAS da Rede Museística Provincial de Lugo, enfocado no rescate e na valorización de patrimonios invisibilizados, promovendo unha nova narrativa e metodoloxía na difusión do legado cultural da provincia.
