“Reboiras: Acción e corazón” aborda a traxectoria vital e política de Moncho Reboiras, militante nacionalista asasinado pola policía franquista no ano 1975, “converténdose nun referente da loita pola liberdade, a xustiza social e a autodeterminación da Galiza”, explican desde o BNG.
Ao remate da proxección terá lugar un coloquio aberto ao público, no que participarán:
- Alberte Mera, director do filme.
- Marisa Canto, militante nacionalista e compañeira de loita de Moncho Reboiras.
- Xosé Manuel Pavón, antigo concelleiro do BNG en Monforte e camarada de Reboiras, que foi represaliado durante a ditadura franquista pola súa militancia política, sufrindo detencións e torturas.
Neste coloquio abordarase tanto a figura histórica de Moncho Reboiras como a súa vinculación coa comarca de Lemos, “recuperando así parte da memoria colectiva do movemento nacionalista e antifranquista na zona”.
Con esta iniciativa, o BNG de Monforte asegura que “pretende contribuír á difusión da memoria histórica, así como promover o coñecemento dunha figura clave do nacionalismo galego contemporáneo”.
