A voz da escritora Syra Alonso (A Coruña, 1899 – México, 1970) emerxe dende o silencio do exilio para contar unha das crónicas máis impactantes da Guerra Civil española. Os seus ‘Diarios (1935 e 1946)’ –Alvarellos Editora– relatan o terror vivido en Galicia e a loita desesperada de Syra por salvar ao seu marido, o pintor Francisco Miguel (A Coruña, 1897 – Carballo, 1936), figura central na arte galega.
Para lembrar estes terribles feitos, e aproveitando que a Asociación para a Recuperación da Memoria Histórica presentará, da man de Carmen García-Rodeja, a nova edición de Diarios; a escritora local Olga Novo ofrecerá un relatorio baixo o título ‘A represión contra a Arte. Asasinato do pintor Francisco Miguel a través dos Diarios de Syra Alonso’. O evento terá lugar este venres 7 de novembro ás 20:00 horas na Casa da Cultura ‘Olga Novo’.
SYRA ALONSO E FRANCISCO MIGUEL
Syra Alonso foi unha das máis extraordinarias cronistas da represión franquista. O seu home, Francisco Miguel, foi detido polos sublevados o 3 de agosto de 1936 e, vinte e seis días despois, aparecía o seu corpo sen vida –xunto con outras tres persoas– tras seren cruelmente asasinados. A partir daquel tráxico acontecemento, Syra iniciou a escrita das súas memorias, uns Diarios que viro a luz no ano 2000.
Francisco Miguel foi asasinado xunto a Juan Boedo Pardo, Andrés Pinilla Fraga e Pedro Pinilla Calvete, sendo enterrados en Bértoa, Carballo. Os seus restos non serían identificados ata setembro de 2023, cando foron exhumados pola ARMH.
