Esta exposición itinerante é a sucesora dunha primeira mostra que percorreu desde o ano 2013 máis de 20.000 quilómetros, pasando por numerosas cidades e localidades da península.

A mostra reflicte en doce paneis a vida e obra do escritor paradelense, considerado o mellor poeta obreiro galego do século XX, que escribiu en Cataluña a maior parte da súa obra, e foi o vínculo perfecto entre Galicia e os galegos emigrantes en Cataluña.

Manuel Rodríguez López é tamén fillo predilecto do Concello de Paradela, e dá nome á Casa da Cultura e ao Certame Literario do que se acaba de presentar a XXXI edición.

A mostra forma parte do proxecto Manuel Rodríguez López, emprendido por Egeria, GaliciaDigital e a familia do escritor, co apoio do Concello de Paradela, a Xunta de Galicia (Secretaría Xeral da Lingua) e a Real Academia Galega.