O evento contará coa presenza de Paula Vázquez Verao, vencellada á Asociación O Colado do vento, e nel haberá unha cata-maridaxe de versos, viños e petiscos deseñada por Brais Gómez, chef do Trespés. Ofreceranse tres viños e petiscos relacionados con elementos presentes no poemario.

Para asistir á parte gastronómica é obrigatoria a reserva no teléfono 661 434 336 tendo a cata-maridaxe un custe de dez euros. 

‘AGORA, EU CARIOTA’                                         

Trátase do primeiro poemario de Xosé Gago, unha obra que edita Laiovento e na que o autor nútrese da súa experiencia no eido da xestión cultural e do patrimonio en comunidade, principalmente no concello da Pobra do Brollón. “O poemario está atravesado por unha reivindicación do comunitario, das redes de coidados e da veciñanza como elemento de resistencia”, comenta Gago. 

O poemario achega unha reflexión de Gago a partir de experiencias e aprendizaxes nos anos que leva vivindo e traballando neste territorio da Ribeira Sacra e estrutúrase en varios capítulos. O capítulo central, ‘Ribeiranas“, está inspirado na experiencia profesional e persoal de Gago nas ribeiras do Sil en Trasmonte, onde participou no proxecto de xestión comunitaria do patrimonio Adegas da Memoria e onde acabou por facerse con viñedo. Así, a ribeira e o mundo da viticultura tradicional teñen un espazo esencial no poemario.

Agora, eu cariota conta cun prólogo da poeta Susana Sanches Aríns e unha nota na contraportada do tamén poeta Xosé Mº Álvarez Cáccamo. Está dispoñible en librarías baixo o selo “VentoAlto”, colección de poesía da editorial Laiovento.