A Casa da Cultura Poeta Lois Pereiro de Monforte de Lemos acolle o venes 6 de xaneiro ás 20:00 h. a conferencia El monasterio de San Vicente del Pino y su colección diplomática. O ponente será Carlos Rodríguez Fernández, doutor en Historia.

Os organizadores, Amigos Patrimonio de Lemos e O Colado do Vento, afirman que “esta conferencia xorde coa intención de dar continuidade a un ciclo de charlas dedicado a divulgar distintos estudos sobre a Idade Media na Terra de Lemos, iniciado coa conferencia A vila de Monforte e a Terra de Lemos na Idade Media –celebrada recentemente na Casa da Cultura–, e para achegar ao público investigacións rigorosas que permitan comprender mellor a importancia histórica de Monforte e da Terra de Lemos durante a época medieval”.

esta conferencia xorde coa intención de dar continuidade a un ciclo de charlas dedicado a divulgar distintos estudos sobre a Idade Media na Terra de Lemos

O conferenciante, Carlos Rodríguez Fernández, centrará a súa exposición na análise da documentación medieval vinculada ao mosteiro de San Vicente do Pino, tratándoa por unha banda como obxecto de estudo en si mesmo, achegando claves para comprender e interpretar documentos antigos, e por outra como ferramenta fundamental para reconstruír, de maneira clara e accesible, aspectos relevantes do contexto histórico e artístico do mosteiro e da súa área de influencia ao longo do tempo.