A Asociación Cultural Rizoma Lemos celebra este mércores 11 de marzo, a partir das 20 horas a inauguración oficial do seu novo espazo de coworking, situado na Avenida de Galicia número 52, entresollado local 8, en Monforte de Lemos.

O acto servirá tamén como presentación pública da Asociación Cultural Rizoma Lemos, unha entidade que nace coa vocación de impulsar o emprendemento, o traballo en rede e a dinamización cultural na cidade e na zona da Ribeira Sacra.

O novo coworking concíbese non só como un lugar que ofrece espazo de traballo compartido ás súas socias e socios, senón como un lugar vivo para a creación e o desenvolvemento de proxectos colaborativos. Ademais de facilitar un ambiente profesional axeitado, Rizoma Lemos aposta por fomentar o traballo en equipo e por ofrecer actividades formativas dirixidas ás súas socias e socios, reforzando así as capacidades e oportunidades da súa comunidade.

Pola súa banda, a actividade da asociación estará enfocada á promoción de iniciativas culturais vinculadas ao emprendemento e á xeración de redes de colaboración. Entre os seus obxectivos destaca a creación de sinerxías entre empresas da industria cultural, entidades sociais e artistas, promovendo un ecosistema creativo que favoreza novas oportunidades económicas e culturais.

Con esta iniciativa, Rizoma Lemos aspira a converterse nun punto de encontro de referencia para a dinamización cultural e económica de Monforte e da Ribeira Sacra, contribuíndo á consolidación dun tecido creativo forte e interconectado. A inauguración estará aberta ao público ata completar aforo.