A voceira socialista do Goberno, Pilar García Porto, destaca “Trátase dun investimento moi importante para a mobilidade da provincia, e para dar resposta coa máxima celeridade ás emerxencias complexas provocadas polos recentes temporais”.
Entre os concellos de Chantada e Carballedo licitáronse traballos para mellorar os case nove quilómetros e medio do inicio da vía da LU-P-1807, que conecta Chantada coa parroquia carballedesa de Cartelos, pasando pola parroquia chantadina de Santa Uxía de Asma. O orzamento de licitación é dalgo máis de 260.000€ e un prazo de execución de 4 meses. Realizaranse na vía a reapertura de cunetas e a renovación do firme.
Declarouse de emerxencia o arranxo de dúas estradas provinciais ao seu paso polos concellos de Pantón e Cervantes, que foron danadas polas intensas choivas do mes de febreiro e que, en conxunto, suman un investimento superior aos 700.000€. No caso de Pantón, a Deputación encargou á empresa TA Isidro Hnos Blanco Trigo as obras para restablecer a circulación na vía LU-P-4103, tralo derrube de terra á altura do quilómetro 2.
O tramo afectado desta estrada, que comunica Ferreira de Pantón co encoro de Santo Estevo, presenta un risco elevado de novos desprendementos, polo que foi preciso realizar a expropiación dos terreos tras a valoración técnica dos profesionais, garantindo a seguridade da intervención e evitando danos maiores. O orzamento estimado é de practicamente 600.000€, e nos vindeiros días aprobarase o proxecto definitivo, “co obxectivo de actuar coa máxima celeridade, sendo conscientes da importancia social desta estrada provincial”, valorou Porto.
