InicioCulturaTodo o que debes saber da ‘4ª Escolma de cinema galego de...

Todo o que debes saber da ‘4ª Escolma de cinema galego de Sarria’

Protagonismo feminino para as cineastas galegas Ana Domínguez, Anxos Fazáns e Diana Toucedo nesta edición na que se proxectarán as súas óperas primas: ‘Os Fillos da Vide, ‘A estación violenta” e ‘Trinta Lumes’. Aquí atoparás un resume do máis importante do certame.

Publicado o

- Advertisement -

Todo en marcha para que Sarria se converta esta fin de semana na capital do cinema galego. O vindeiro venres 22 comezará oficialmente o certame coa proxección ás 20:00 h. na Casa da Cultura da pezas realizadas polas alumnas e alumnos do IES Xograr Afonso e do IES Gregorio Fernández. Estes traballos son froito do Obradoiro de Creación Audiovisual impartido pola cineasta Anxos Fazáns esta semana, formación na que as rapazas e rapaces aprenderon conceptos básicos de produción para preparar a rodaxe e poder editar  a curtametraxe.

Para o sábado 23 queda o groso das actividades da mostra na que se poderán ver ao longo do día o resto de obras audiovisuais desta edición, ademais dos coloquios correspondentes e un concerto musical que pechará o certame deste ano.

Ás 12:30 h. no local do Cine Clube La Unión – Leslie Nielsen terá lugar a proxección de tres filmes do director burelés Adrián Canoura: “Salitre nas veas”, “O porco e o seu espírito” e “Caerán lóstregos do ceo”. Dende a organización convidan a coñecer a obra deste creador lugués que, malia a súa xuventude, xa sorprendeu a programadores de festivais como Montreal, Bogotá ou Sao Paulo. A súa obra explora as esencias da identidade galega, especialmente dende o plano simbólico.

Salitre nas veas encáixase no xénero experimental no que home e mar son descoñecidos o un polo outro e loitan contra o tempo, contra a súa extinción, contra o final de si mesmos, pero respéctanse por igual.

O porco e o seu espírito é un retrato experimental. O home, na necesidade de explicar e entender o mundo que lle rodea, dá ao animal, especialmente a nivel simbólico, funcións desempeñadas, nun primeiro momento só para si mesmo. Crese que o porco adiviña o seu fin, sente a morte, e véspera da mata pasa a noite batendo na porta da corte, o que se expresa coa crenza de que esa noite se levanta sete veces para comer ao dono.

Caerán lóstregos do ceo é unha peza documental que toca a mística e a natureza. O lóstrego é un dos peores males para a sociedade rural galega e asóciase co maligno, co Demo…

Ao rematar a proxección das tres pezas haberá unha conversa/vermú co cineasta.

E pola tarde, na Casa da Cultura, o protagonismo absoluto será para as mulleres, tres cineastas galegas de talento prometedor que traen á ‘Escolma’ tres óperas primas. Ana Domínguez preséntanos ás 17:00 h. “Os fillos da vide”, Anxos Fazáns ás 18:30 h. “A estación violenta” e Diana Toucedo ás 20:15 h. “Trinta lumes”.

Os fillos da vide é un documental que naceu a partir das vivencias da directora ruesa na vendima, das súas lembranzas da infancia arredor desta actividade. A obra pretende enxalzar a vendima como un concepto que vai máis alá da simple recollida da uva pois representa unha festa familiar, un lugar para o encontro e a convivencia.

A estación violenta é unha película que parte da novela do lugués Manuel Jabois e trata dunha xeración triste e frustrada antes de tempo. Un reencontro inesperado cos mellores amigos da adolescencia que fará disparar as pulsións.

Trinta lumes é un documental no que a superstición e a traizón e atopan de fronte. A protagonista, Alba de doce anos, desexa descubrir o descoñecido, misterioso e fascinante da morte. Xunto ao seu mellor amigo, Samuel, entran en casas abandonadas, recorren aldeas perdidas e adéntranse no interior dunhas montañas que agochan outro mundo paralelo. Unha viaxe dende a inocencia para atopar o misterio da loita entre a vida e a morte. Un relato entre o documental e a ficción que transcorre nunha aldea do Courel coas súas rutinas diarias.

Cartel “Trinta lumes” de Diana Toucedo.

Tras as proxeccións  están programadas conversas coas directoras Anxos Fazáns e Diana Toucedo.

Para rematar a xornada e a ‘Escolma’ deste ano haberá un concerto na Sociedade Cultural La Unión ás 23:30 h. a cargo de Baiuca con audiovisuais de Adrián Canoura. Unha combinación do máis avanzado e vangardista da música electrónica coas raíces máis puras e salvaxes da cultura tradicional galega.

ÚLTIMAS

Roteiro Literario para coñecer as localizacións da novela “A Boca do Monte”, en Quiroga

Preto dun cento de estudantes do IES As Lagoas de Ourense coñeceron o pasado...

O BNG pon en marcha, “Arranxo XA das nosas estradas”, campaña para mellorar as infraestruturas viarias na provincia

O Bloque Nacionalista Galego de Lugo inicia unha nova campaña para reclamar o arranxo...

8ª Andaina polo Corazón de Galicia, o 21 de abril en Chantada

O domingo, 21 de abril, celébrase a 8ª Andaina polo Corazón de Galicia, que...

Que acontece coas Unidades de Drogodependencias dos concellos?

Na última xuntanza dos concellos que contan con Unidades Municipais de Asistencia á Drogodependencia...