As persoas participantes no obradoiro traballaron coa metodoloxía do Teatro Foro e as técnicas do Teatro do Oprimido, unha concepción teatral desenvolvida nos anos 60 e 70 polo dramaturgo brasileiro Augusto Boal e inspirada na pedagoxía de Paulo Freire que sitúa ao educador e ao educando nun plano de igualdade.
O novo grupo de teatro traballou técnicas de improvisación teatral ao tempo que se abordaba a violencia de xénero e estratexias para combatila. O resultado presentábase este xoves pola tarde nunha cita na que a intervención do público era fundamental para o desenvolvemento da obra, “Estamos todos moi contentos co resultado e a participación do público. No teatro foro a intervención do espectador é fundamental, é parte activa da obra. O grupo tiña dúbidas antes da estrea sobre que facer se a xente non participaba, pero foi incrible como todo o mundo quería intervir e dar a súa opinión”, explica o monitor do grupo de teatro, Zósimo Yubero.
Con todo “Lila quere ser violeta (ou a man ten dúas caras)” é unha creación colectiva vinculada a un conflito social, neste caso a desigualdade de xénero. Conta a historia de Lila que tivo desde nena unha contorna social que lle fai identificar un lugar de somentemento na sociedade, e ela aquere ser violeta e saír dese mundo, pero toda a estrutura de opresión cara as mulleres faina caer nunha relación de parella na que volve a ese lugar de sumisión.
Esa relación non igualitaria non é culpa nin responsabilidade de Lila, o sistema non ofrece alternativas e hai que construír colectivamente outra educación, outros modelos de sociedade diferentes. “Lila quere ser unha muller que decida facer coa súa vida o que lle dea a gana”, aclara Zósimo e ao final da obra pregúntaselle ao público que se pode facer para que as mulleres saian dese lugar de somentemento na que as colocou o sistema. “Co teatro foro traballamos outro modelo pedagóxico de escoita e respecto mutuo”, asegura o monitor.
A obra inicial de 20 min de duración con coreografías e momentos oníricos e realistas, é a suma de experiencias das persoas participantes no grupo e do público, estendéndose a súa duración segundo a implicación. A intención é poder xirar con esta peza por outros concellos e non descartan volver a actuar en Pantón co obxectivo de conseguir unha igualdade real e poder cambiar as cousas desde o respecto.
Dío tí, estrea en Pantón / Concello de Pantón
