O encontro enmarcábase no proxecto “Escola, Cultura e Territorio” promovido polas áreas de Cultura das Deputacións de Lugo e da Coruña e polo Consello da Cultura Galega. Na inauguración da xornada, a deputada de Cultura Iria Castro, a presidenta do Consello da Cultura Galega, Dolores Vilavedra, e o asesor cultural da Deputación da Coruña Xavier Campos expuxeron a súa visión concordante en relación coa política cultural. Nese sentido, destacaron que “a política cultural é máis que programación cultural ou programación de espectáculos, a cultura é unha ferramenta de transformacion social e de fortalecemento da autoestima colectiva e da identidade”
A este respecto, a deputada de Cultura, Iria Castro remarcou a elección do Pazo de Tor como escenario para a xornada, lembrando que “a apertura de Tor como museo e a creación da Rede Museística, que cumpre 20 anos, supuxo unha aposta por descentralizar a cultura, botar raíces no rural e crear comunidade”
O encontro artellouse arredor de catro mesas de traballo con diferentes temáticas. A primeira centrouse na profesionalización cultural, coa exposición de modelos de xestión e proxectos sustentables que xeran valor económico se social como Outonía Cooperativa, Gaita Filmes, a Asociación Ser, a Asociación Amigos de Manuel Jorge de Chantada ou a Trienal de Sarria.
A segunda mesa centrousee en iniciativas enfocadas na posta en valor da identidade local, a memoria histórica e o legado cultural como Mariña Patrimonio, Fundación Legar, Son d´Aldea, Espazo Caritel ou o programa de divulgación arredor dos xacementos da Pobra do Brollón.
Na terceira mesa, falouse sobre asociacionismo cultural e construción de comunidade a partir da experiencia de colectivos como Xermolos, a Asociación Aldear, o IESCHA, o Instituto de Estudos Ulloáns, o Seminario de Estudos do Valadouro ou Xotramu.
O encontro incorporou tamén a experiencia da Foliada da Fonsagrada, o Breason, o Castañazo Rock, Fancine de Lemos ou Teatro das Cortes como iniciativas que contribúen a fortalecer o tecido social e crear espazos de participación cultural.
I Encontro de Boas Iniciativas Culturais no Pazo de Tor / Deputación Provincial
