A Biblioteca Pública Municipal de Escairón dará a coñecer a obra dun dos seus veciños máis queridos, Pepiño. Farao a través dunha exposición pictórica única inspirada en diferentes estilos que amosan o valor que lle dá o autor á súa afección pola pintura. A mostra do entrañable veciño de Escairón inaugurarase o día 5 e permanecerá aberta durante todo o mes de agosto.

“Trátase dun dos veciños máis entrañables e queridos da localidade. Porén, a gran maioría da veciñanza descoñece por completo unha das súas grandes paixóns: a súa afección pola pintura”, comenta a bibliotecaria Mónica Carballo. A exposición pictórica homónima “promete sorprender e emocionar a quen queira coñecer o traballo artístico de Pepiño”, di tamén a responsable da Biblioteca Municipal.

A exposición terá lugar na sala de exposicións da Biblioteca Pública Municipal do Saviñao, ubicada no baixo do edificio, e poderá visitarse do 5 ó 31 de agosto, en horario de luns a venres de 8:30 a 14:30 horas.