Conta atrás para unha nova edición do festival de música folk de referencia no sur de Lugo, As Cores do Outono. O evento está organizado polo Concello da Pobra do Brollón e conta co apoio da área de cultura da Vicepresidencia da Deputación de Lugo.
A presentación oficial para medios do cartel e da programación desta XII edición tivo lugar na área recreativa de Samugueiros, lugar onde se realiza cada ano o devandito festival. No acto estiveron o alcalde Xosé Lois Maceda e os concelleiros Marián Martínez e Agapito Rodríguez, xuntos á deputada de Cultura Iria Castro.
No que respecta á programación revelaron os grupos participantes para a noite do sábado 12 de setembro: Balteira, Ialma e Galega de Bailables, e lembraron que o venres está programado un espectáculo para todos os públicos a cargo da xograresa Alba de Vales.
A concelleira de cultura, Marián Martínez, comentaba que “un ano máis apostamos pola nosa música de raíz con propostas que beben da tradición oral galega”, e engadía, “son tres concertos de moi alta calidade musical que han de encher de baile Samugueiros”.
A deputada Iria Castro tamén salientou que “As Cores do Outono o apoio ao talento de alto nivel mediante a programación cultural e o compromiso por achegar ao público novas propostas de música tradicional galega”.
Os concertos do festival ‘As Cores de Outono’ comezarán a partir das 21:00 h do sábado a carón do río Saa, na coñecida área recreativa Samugueiros, e dende as 20:00 h haberá postos de artesanía e de comida.
GRUPOS PARTICIPANTES
A formación que abrirá os concertos do sábado, Balteira, une a catro grandes mestres de música tradicional nun proxecto que recupera o repertorio oral galego, incorporando arranxos contemporáneos pero respectando a estrutura e a emoción das pezas tradicionais. Os cantares que sempre animaron a festa e as melodías para o baile, son o eixo sobre o que xiran os seus concertos, mantendo o espírito da foliada desde a calidade técnica e interpretativa mediante voces, percusións, acordeón e ventos.
O segundo grupo a actuar en As Cores do Outono será Ialma, tamén cuarteto, formado por pandereteiras e cantareiras galego-belgas. Con motivo da celebración de 25 anos de carreira, que incluíron sete discos e concertos por todo o mundo, Ialma traerá o seu espectáculo Homenaxe. Trátase dun concerto emocionante e festivo que honra as raíces galegas, a memoria e a resistencia, impulsado pola enerxía multicultural de Bruxelas.
As propostas musicais rematan ao grande con Galega de Bailables, unha formación de sete virtuosos, a maioría deles con raíces na Pobra do Brollón. A base de voces, percusión, ventos e zanfona, darán un concerto cheo de enerxía con muiñeiras, xotas e outros ritmos pensados para poñer a todo Samugueiros en pé.
ESPECTÁCULO TEATRAL PARA A VÉSPERA DOS CONCERTOS
O programa desta duodécima edición de As Cores do Outono complétase cun espectáculo o venres 11 ás 20:30 horas na Casa da Cultura ‘Olga Novo’. A actriz e xograresa ourensá Alba de Vales, nome artístico de Alba Grande, levará á Pobra do Brollón unha proposta para todos os públicos, Unha xograría de aldea. O espectáculo combina teatro e música ao tempo que indaga nas memorias aldeás e historias inspiradas nos romances de cego e contos e cantigas tradicionais.
