O Concello de Ribas de Sil continúa este xoves, 20 de agosto, coa programación das Conversas de Verán, que se desenvolven na Aula de Pesca de San Clodio ás 21:00h. O protagonista nado no Nocedo é doutor en Xeografía e desde hai anos traballa como profesor de español para estranxeiros, unha profesión que lle permitiu residir e exercer a docencia en países e contextos culturais moi diferentes. Ao longo da súa carreira pasou por Rusia, Andorra e Marrocos e actualmente traballa como docente na Dubai International Academy, nos Emiratos Árabes Unidos.

A súa experiencia internacional presenta, ademais, unha particularidade que centrará unha parte importante da conversa: a proximidade con algúns dos grandes conflitos que marcaron a actualidade internacional dos últimos anos. A súa etapa en Rusia coincidiu cun período especialmente complexo na rexión pola invasión rusa de Ucraína e, máis recentemente, desde Dubai viviu de preto a escalada bélica entre Israel e Irán e a crise no Golfo Pérsico.

Ademais de coñecer unha interesante traxectoria profesional, a cita permitará reflexionar sobre como se viven desde dentro realidades internacionais que habitualmente percibimos desde a distancia. Ao mesmo tempo, “Historias de vida” mantén un dos seus principais obxectivos: recuperar as conexións entre as Montañas do Courel e aquelas persoas que, partindo destas terras, desenvolveron as súas vidas en diferentes lugares do mundo.