Os amantes dos descensos extremos en bicicleta nas comarcas do sur de Lugo están de sorte. Esta fin de semana o Concello de Sarria acolle o que, segundo palabras do Deputado Provincial de Deportes en funcións, Rivera Capón, é “o mellor descenso urbano de España“.
Neste caso estariamos a falar dunha competición DHU, siglas que se corresponden coa modalidade deportiva coñecida como Downhill Urbano, adaptación do descenso de montañas en bicicleta a rúas urbanas.
O descenso urbano contará con dous circuítos, no que participarán preto de 200 bikers. Un dos percorridos é o Mini DHU, no que participan rapaces de entre 5 e 14 anos cun percorrido duns 200 metros e mini estruturas adaptadas para a realización de acrobacias. No percorrido dos maiores, de maior dificultade e distancia, os participantes baixarán dende o Campo da Feira ao Malecón. O percorrido é de 1,2 quilómetros en descenso continuo e transcorre por parte do Camiño de Santiago que atravesa a vila. Os ciclistas deberán superar moitos atrancos: estruturas de madeira, escalinatas, troncos… e incluso afrontar probas de máxima dificultade como son subir por un camión de butano ou saltar dende unha casa.
Na presentación do evento, hoxe mércores 10 de xullo no Malecón de Sarria, estiveron o Deputado de Deportes en funcións, Pablo Rivera Capón, o Concelleiro de Deportes do Concello de Sarria, Félix Seijas Fernández, o Presidente do Clube DHG Galicia, David Somoza, e Efrén Castro, o que será deputado provincial polo BNG.
O evento, ademais dos apoios dalgún patrocinador, conta coa colaboración económica do Concello de Sarria e da Deputación de Lugo.
Dende a organización advirten que a inscrición segue aberta na web: http://emesports.es/
HORARIOS
Sábado 13 de xullo
– De 9:30 a 11:00 horas: Adestramentos de Mini DHU.
– 11:15 horas: Carreira Mini DHU.
– De 16:45 a 20:15 horas: Remonte e servizo de transporte
– De 17:00 a 21:00: Adestramentos DHU Vila de Sarria e recollida de dorsal.
Domingo 14 de xullo
– De 10:00 a 13:45 horas: Remonte e servizo de transporte.
– De 10:00 a 14:00 horas: Adestramentos DHU Vila de Sarria
– De 10:00 a 13:45 horas: Remonte e servizo de transporte
– 16:00 horas: Primeira manga.
– 17:30 horas: Segunda manga.
– 18:30 horas: Peche de carreira
– 19:00 horas: Entrega de premios, sorteo de agasallos .
