Inaugurado o videomarcador deportivo do pavillón da Pinguela

O Alcalde de Monforte, José Tomé Roca, inaugurou nesta mañá de mércores, 22 de decembro, o novo videomarcador deportivo Led de última xeración do Pavillón Polideportivo Municipal da Pinguela, que foi adquirido por un importe de algo máis de 27.000 euros.

Novo videomercador A Pinguela / concello de Monforte

No acto inaugural, o Alcalde estivo acompañado polo Secretario xeral para o Deporte da Xunta, José Ramón Lete, e polo Xefe do servizo provincial de deportes, Manolo Cadramón, así como a 1ª Tenente de Alcalde, Gloria Prada, o concelleiro de Deportes, José Manuel Mougán, entre outras autoridades.

O Alcalde salientou “cóntase dende hoxe cunha ferramenta esencial para o desenvolvemento de todo tipo de eventos deportivos, e tamén facilitará os adestramentos e competicións dos equipos monfortinos que habitualmente usan estas instalacións, como o Club Voleibol Ribeira Sacra, o Club Korbis ou o Club de Ximnasia Rítmica Quicela, así como as actividades dos centros educativos da cidade”.

Esta Pantalla Led, que ten unhas dimensións de 10 m2 (4 x 2,5 m.),  pode utilizarse como marcador electrónico multideporte, como pantalla publicitaria ou como soporte audiovisual para calquera evento deportivo ou non deportivo, “polo que permite darlle un valor engadido ó pavillón da Pinguela”.

No Pavillón Polideportivo da Pinguela, que se ubica na estrada de Sober, adestran e compiten diversos clubes da cidade e alberga eventos deportivos de diversas modalidades como taekwondo, ximnasia rítmica e voleibol.

Nas instalacións do pavillón tamén se levan a cabo actividades propias do deporte escolar monfortino, dispútase a liga local de fútbol sala e lévanse a cabo as actividades do Programa Deportivo de Verán que organiza o Concello de Monforte cada ano.

DEIXAR UN COMENTARIO

Please enter your comment!
Please enter your name here