Juan Pedro Durán, coñecido como ‘Gussy’ e que xa entrevistamos tempo atrás en Xornal de Lemos, é un dos artífices e presidente do Club de Billar Snooker Sarria, unha nova iniciativa deportiva que conta tamén co apoio do Concello de Sarria.
O proxecto ten como obxectivo promover o billar en diferentes modalidades, centrándose polo de agora no Snooker e no Pool americano. A antiga Feculera acolle este novo club que conta con dúas mesas de billar profesionais, unha delas de snooker –só hai tres iguais en toda Galicia–.
Segundo sabemos por Gussy, este club será anfitrión na celebración das fases previas da Liga Nacional de Snooker. Acollerá unha fase inicial na que xogadores de toda Galicia virán competir a Sarria co obxectivo de seguir nas seguintes roldas desta liga nacional.
O martes 30 de agosto comezaron unhas xornadas de portas abertas para que calquera veciño/a ou interesado/a se achegue a coñecer as instalacións e interesarse para asistir a clases ou cursos que organizarán ao longo do ano. Este xoves 1 de setembro é o último día sendo o horario de 17:00 a 20:00 h.
