Este venres 16 de setembro tivo lugar a 2ª etapa da XX Volta Ciclista a Galicia, a máis longa de todas e cun percorrido que tivo a localidade de Taboada como punto de saída e como liña de meta.
O deputado de Deportes Efrén Castro, que participou no corte de cinta protocolario inicial e que seguiu a carreira, comentou en declaracións a Emesports TV antes da súa saída que os ciclistas ían atopar “unhas paisaxes e un territorio excepcional pero tamén unha etapa moi dura, a etapa máis longa da Volta con territorios sen grandes portos pero un percorrido rompepernas e cunha subida final aos Peares que aparte dunha paisaxe icónica vai marcar a etapa que vai ser moi dura pero tamén moi divertida para eles”.
Castro tamén referiu o “bo ambiente ao paso dos corredores” e lembrou que “desde a Vicepresidencia da Deputación apostamos por todos os deportes e o ciclismo ten un oco especial porque aúna como poucos esa promoción do territorio, promoción turística, e o espectáculo do esforzo deportivo. E polo tanto, para nós é unha aposta constante que vai permanecer e que ademais ten moita afección tanto na provincia de Lugo como no país”.
O mexicano Edgar Cadena proclamouse campión da proba, que se decidiu na última subida cara a Taboada tras un percorrido de 163 quilómetros e que pasou por estradas dos concellos de Monterroso, Portomarín, Paradela, Sarria, O Incio, Bóveda, A Pobra do Brollón, Monforte, Sober, Pantón, O Saviñao e Chantada. Ademais de distinguir o campión de etapa, na entrega de premios, Efrén Castro entregou o maillot ao mellor galego da xeral a Manuel Rodríguez, do Froiz.
A Vicepresidencia da Deputación de Lugo achega 10.000 euros para a organización desta etapa lucense da Volta a Galicia.
18 EQUIPOS, 10 GALEGOS
Esta proba é un escaparate para ciclistas das categorías Elite e Sub 23, que preparan o salto ao ciclismo profesional. Nesta vixésima edición, participan 18 equipos, entre eles o Eolo Kometa, que conta con algúns dos corredores máis destacados destas categorías.
Entre os 10 equipos galegos que compiten na Volta destaca a presenza do Cidade de Lugo, con tres corredores da provincia: Pablo Vázquez Pérez e Juan José Prado Neira, de Lugo, e David Pollán Díaz, de Castro de Rei. O cuarto lucense do pelotón é o monfortino Estefan González Expósito, nas filas do Retelec.
